KALIBO,Aklan — Bukon pa it sigurado nga sa Land Bank of the Philippines maga-utang it mabahoe nga kantidad ro Aklan provincial government agud nga matustusan ro mga proyekto nga uwa nakasueod sa andang pondo para makaron nga dag-on.
Apang, ginkumpirma ni Bernardino Villaruel it Aklan provincial treasurer office nga plano gidman it gobyerno probinsyal nga mag-utang it kapin sa P445 milyon pesos para mahueag ro mga proyekto nga uwa it pondo nga nakataeana para makaron nga dag-on.
Ginpaathag ni Villaruel nga maskin ro Department of Finance hay naga-engganyo ag nagata-o it option nga kon uwa it bastante nga pondo ag kon may kinahang-eanon nga proyekto nga iimplementar hay pwede nga mag-utang sa haega nga pagakinahang-eanon agud nga maghueag ro ekonomiya.
Nauna eon nga ginpahayag ni Aklan second district board member Jay Tejada sa interview it Bombo Radyo nga ro pinakamabahoe sigon nga pondo hay maagto sa proposed construction it multi storey parking building it provincial hospital nga naga-abot sa masobra sa 300 milyon pesos samtang ro nabilin hay pagabak-eon it construction and maintenance equipments ag pag ayos it farm to market road ag tulay partikular sa Brgy. Dalagsaan, Libacao sa idaeum it Philippine Rural Development Program.
