KALIBO, Aklan–Nagapadayon ro pagpanupod it food packs it gobyerno probinsyal sa mga apektadong residente it pagbaha sa Aklan.
Ginpahayag ni Aklan Governor Joen Miraflores nga ro sigidas nga pagpanupod it food assistance sa mga kalibonhon nga eubus nga naapektuhan it pagbaha hay ginkabuligan it lokal nga gobyerno ag provincial government.
Raya hay kaparte it bag-ong programa it gobyerno probinsyal ukon ro ginatawag nga “Pagtatap” kon siin sa oras it kalamidad kaparehas kara hay may gobyerno nga nagatatap ag naga-ulikid sa mga akeanon.
Ginpahayag dugang ni Gov. Miraflores nga sigidas pa ro pag-aeabutan it mga bulig maghalin sa mga pribadong sektor ag asosasyon kamana man sa nagkaeain-eain nga mga senador.
Inde suno kana magkabaeaka ro uwa pa nakabaton it ayuda bangud nga sigidas ro re-packing makaron it reliefs goods para sa mga apektadong residente nga uwa pa natawan-an it food assistance.
