KALIBO, Aklan—Napatangis sa sobrang kalipay si Atty. Jirah Arboleda matapos nga sambilog ro anang pangaean sa 3,992 nga mga nakalistang nakapasar sa November 2022 Bar Examination.
Suno kana, idto imaw sa sementeryo nagbisita sa anang ama samtang nagahueat it resulta it prestihiyosong eksaminasyon.
Uwa eon nana napunggan ro anang mga eoha kat nabasahan ro mga mensahe it pagdayaw maghalin sa anang pamilya, mga abyan ag kakilaea sa sobrang kalipay nga nabatyagan bangud nga sambilog imaw sa mga nakapasar sa mga linibong nagbuoe it eksaminasyon sa pagka-abogasiya.
Naging inspirasyon ni Atty. Arboleda ro anang bilog nga pamilya ag ro pagsalig sa Diyos bangud nga bukon man it hangae ro anang inagyan halin sa pag-eskwela, pagreview ag sa pagbuoe it mismong eksaminasyon.
Panugyan nana sa mga gustong mag-abogado nga maghugod eang sa pagreview ag eakipan it hustong pagpangamuyo bangud nga raya ro sambilog sa mga yabe sa anang naangkon nga kadaeag-an.
Si Atty. Arboleda hay residente it Brgy. Pook, Kalibo kon sa siin imaw ro kamanghuran sa tatlong magmanghod.
Ro anang ama hay dating public school teacher samtang ro anang ina mat-a hay sangka legal researcher sa regional trial court.
Mag-eowas kay Atty. Arboleda, nakapasar man sanday Atty. Sheila Ang; Atty. Rea Tabuyo; Atty. Bridgette Villorente ag Atty. Jessie Jean Mangilaya nga parehong graduate it Aklan Catholic College.
