KALIBO, Aklan–Nakataeana nga magbaton it tumaeagsahon nga Presidential Awards for Filipino Individuals and Organizations Overseas ro sangka Aklanon Overseas Filipino Worker nga naka-base sa Kuwait ag tumandok it Brgy. Panipiason, Madalag.
Suno kay BANAAG Presidential Awardee Mr. Dennis Nama Rata nga ginpilit nana nga makauli sa nasyon para personal nga batunon ro pagpasidungog makaron nga adlaw sa Manila Mariott Hotel sa Pasay City.
Ro programa suno kana hay pagapangunahan it Commission on Filipino Overseas (CFO) matapos rayang taw-an it otorisasyon ni Pangueong Rodrigo Duterte.
Nauna eon sigon nga nagpabutyag ro pangueo it kapas-eawan nga makatambong bangud sa pagiging masako sa pagtapos it anang termino, hin-aga.
Suno kay Rata, owa naging madali ro nominasyon para mapili bilang sambilog sa mga awardee.
May ap-at sigon nga estado it technical working group nga paga-agyan kung siin sanda ro magapatigayun it screening.
Pila sigon sa mga rason nga nagtueod kana para maging aktibo sa pagbulig sa kaparehong OFW hay ro nakita kara nga mga problema nga kinahang-ean mataw-an it nagakaigo nga aksyon ag igtueopangod.
Sa pilang dag-on sigon nana nga pagtrabaho sa Kuwait, nasaksihan kara ro kalisod eabi eon it mga domestic helper nga naka-eksperyensya it pagpang-maltrato, owa ginapauli it employer apisar nga tapos eon ro kontrata ag maabu nga iba.
Si Rata hay nagaserbing Vice president it mga Aklanon OFW sa Kuwait.
