Padayon ro maid-id nga imbestigasyon sa natabo nga alleged kidnapping sa sangka Misis nga residente it Mindoro nga masobra sang dominggo eon nga gina-usoy it anang pamilya.
Suno kay PLt. Abelardo Palma Jr., chief operation officer it Altavas PNP, nakit-an ro nasambit nga misis sa Sitio Bangkeruhan, Brgy. Linayasan Altavas Aklan bandang alas-2 it aga-aga adlaw it Myerkules, Abril 29 matapos nga makit-an raya it mga residente sa kilid it highway nga naga-pangayo it bulig.
Sa pagresponde sigon it kapulisan, nakit-an ro sitwasyon kara nga naga-gapos it masking tape nga haeuga eon sa anang siki ag may mga injury sa anang waea nga alima.
Insigida man raya nga gindaea sa ospital para sa nagakaigo nga pagbueong.// dugang pa ni Plt. Palma, base sa mga salaysay it misis, ku Abril 20 hay nagbyahe halin sa banwa it Makato paadto it Caticlan para nga ihatod ro anang mga unga ag kabulig nanda nga pauli eon sa Mindoro.
Pagkatapos sigon nana it paghatod hay nag-sakay raya sa tricycle pabalik sa Makato apang samtang una sa byahe hay nadueaan raya it alintro. Naumpawan eon lang sigon raya sa lugar kun siin imaw nakita.
Dugang pa it biktima, ginapina-inom sigon imaw it tubi nga nagiging rason it pagkaduea it anang alintro.
Base man sa pahayag it biktima, may daea imaw nga cash nga nagabalor it P850k nga nakasueod sa beltbag, apang kat maumpawan hay nataeupangdan eon lang nana nga uwa eon raya.
Sa makaron, nagapatigayon eon it backtracking ro kapulisan para masolbar ag makabuoe it mabaskog nga ebidensya sa mga alegasyon it nasambit nga biktima.
