Kalibo Aklan —– Nag-apela ro mga katapo it Aklan Medical Society sa mga pomoeuyo nga indi magpakampanti makarun nga ginpaidaeum eun lang ro probinsya it Aklan sa General Community Quarantine (GCQ) maghalin sa Enhanced Community Quarantine (ECQ).
Suno sa sambilog sa mga board member ag dating tagapamuno it Aklan Medical Society nga si Dr. Nikki James Francisco nga maskin ginhaeugaan eun ro pilang ka mga polisiya sa probinsya hay owa raya nagakahueogan nga euwas eun ro tanan sa coronavirus disease (COVID-19).
Gin-insister pa kara nga ro virus hay una eamang permi sa palibot ag nagahueat it tawo nga pwedeng atakehun.
Bangud kara, hasta nga owa pa it bueong ukon bakuna para may pangkontra ro resistensya it sangka tawo sa virus dapat masanay eun sa panibag-on nga klase it pagpangabuhi ukon New Normal.
Raya hay ro hugot nga pagsunod sa ginpatuman nga physical ukon social distancing ag pagsuksok it facemask kada magguwa sa panimaeay.
Permi nga paghugas it alima ag paggamit it alcohol ukon alcohol-based sanitizer.
Kinahangean man suno pa kana nga likawan ro mga hilimuon nga nagaresulta it pagtieilipon it maabong mga tawo kapareho it mga kasadyahan, fiesta ag maabo pang iba.
Indi makikipag-close contact sa mga kakilaea ag magpabilin sa tagsa ka panimaeay mas kapin ro mga madali mahawan it sakit kapareho it mga senior citizens, menor de edad , nabdos , may sakit nga diabetes, asthma, hypertension, thyroid problem, obesity, arthritis, ag kidney.
