KALIBO, Aklan — Eubus nga ginkakibot ag ginkasubo it batikang abogado sa Aklan nga si Atty. Plaridel Morania ro ginakabig nana nga “senseless ag brutal” nga pagpatay sa anang mayad nga amigo nga si Juan “Johnny” Dayang, sangka prominente nga media personality sa nasyon.
Nangawa sigon imaw bangud nga ko kasagsagan it career ni Dayang bilang sangka peryodista, kun sa siin, may pilang pulitiko man imaw nga ginabanatan sa anang mga column hay owa imaw naka-eksperyensiya it pagpamaeag sa anang kabuhi.
Makaron pa sigon raya natabu nga bukon eon imaw it masyadong aktibo sa anang trabaho bilang mamamahayag.
Kat estudyante pa eamang sigon sanda ni Dayang sa Northwestern Visayan Colleges hay naging presidente raya it supreme student council ag editor-in-chief it NVC forum.
Bangud nga halin sa kubos nga pamilya rason nga nag-working student raya sa nasambit nga eskwelahan samtang nagatuon sa kolehiyo.
Sa batang edad hay nakitaan sigon raya it kaaeam ag abilidad nga imaw ro nagpasikat kana sa andang campus.
Nagtrabaho man raya sa printing press it sikat nga Akeanon writer ag historian nga si Roman dela Cruz nga mas pa nga nagpahasa sa anang kamayad sa pagsueat.
Nakaagum sigon raya it pagrespeto halin sa anang mga kaparehong student journalist kat maging representante it Aklan sa prestihiyosong Conference Delegate Association of the Philippines, kun sa siin gindayaw imaw sa anang mga mayad nga diskurso ag write-ups.
Gindugang pa ni Atty. Morania nga hasta sa makaron hay owa eamang ginarespeto ro 89 anyos nga si Dayang sa journalism ag public relations, kundi sa anang adbokasiya nga mapabaskog ro press freedom ag public discourse.
Kabay suno kana nga makonsensiya kon sin-o ro sa likod it nasambit nga krimen.
Kadungan kara, gin engganyo man nana ro mga awtoridad nga maid-id nga imbestigahan ro natabu ag tumuron ro gunman ag mastermind agud nga mapasabat sa andang ginhimo.
Madumduman nga si Dayang hay ginbaril it makapilang beses it sangka owa nakilaea nga eaeaki samtang sa sueod it anang baeay sa Villa Salvacion, Brgy. Andagao, Kalibo pasado alas-8 it gabi-i it Martes, Abril 29.
