Nakalista ro Malay-Boracay Tourism Office it pagtaas sa tourist arrival ku buean it Abril.
Suno kau Kathrine Licerio, tagapaghambae it nasambit nga taeatapan, base sa andang datos, nalista ro kabilugang 225,030 nga tourist arrival sa isla it Boracay.// mas mataas raya it 15% kumpara sa masobra 195,000 nga nalista sa parehong tyempo ku nagtaliwan nga dag-on.
Sa nasambit nga numero, 27,312 kara ro foreign tourist, 195,459 ro domestic tourist ag masobra 2,000 ro Overseas Filipinos.
Paathag ni Licerio, sambilog sa mga nakikitang rason it pagtaas hay ro pagpatigayon it mga aktibidad kapareho it Love Boracay kun sa siin raya ro ginakabig nga sambilog sa mga pinakamabahoe nga aktibidad sa isla.
Dugang pa kara, sa andang pagmonitor halin Abril 24 hasta it Mayo 3, nga mismong pag-umpisa it nasambit nga selebrasyon, nakalista ro andang taeatapan it masobra 83,000 nga tourist arrival. Ro anda sigon nga daily tourist arrival sa sueod it napueong adlaw nga selebrasyon hay umabot sa masobra 8,000 kada adlaw.
Ginpunto man nana nga naging generally peaceful ag nalista nanda ro zero incident sa nasambit nga okasyon.
Samtang, ginaeauman ro pag-abot it cruiseship nga MS Serena sa maabot nga May 15.
Sa makaron, nagapahaom eon sigon sanda sa mga naka-linyadang aktibidad para sa buean it Hunyo.
