KALIBO, Aklan — Ginpaathag it sangka political analyst sa Aklan nga natapos eon ro kontrata ni Atty. Nicholas Kaufman bilang lead defense counsel ni dating Pangueong Rodrigo Duterte sa ginapangatubang kara nga kaso sa International Criminal Court (ICC).
Suno kay Atty. Axel Gonzales nga ko Marso 31, 2026 hay natapos eon ro engagement contract ni Kaufman kun sa siin ginpahilway eon man imaw ni Duterte halin sa anang legal representation samtang naga-usoy it bag-ong counsel ro kampo it dating pangueo.
Kaabang-abang suno kana ro masunod nga kabanata bangud nga matsa hearing eon sa korte ro masaksihan.
Si Kaufman ro nagpanguna sa depensa ni Duterte sa mga pagpamati angot sa kasong crimes against humanity nga may kaangtanan sa war on drugs it dating administrasyon.
Pilang buean man nga naging sentro it atensyon ro abogado matapos nana nga kuwestiyunon ro proseso it ICC ag ginpamilit nga owa it direktang ebidensya kontra sa dating pangueo.
Sa makaron, owa pa it opisyal nga anunsyo kun sin-o ro magabueos bilang bag-ong lead counsel ni Duterte sa ICC proceedings.
Sa pihak nga parte, nagapati si Atty Gonzales nga maabswelto imaw sa ginapangatubang nga kaso bangud kawad-an sigon it hurisdiksyon it korte sa Pilipinas.
Padayun nga ginasubaybayan it publiko ag international observers ro kaso nga ginakabig nga sambilog sa pinakamabahoe nga legal nga hangkat nga ginapangatubang it sangka dating lider it Pilipinas sa international court.
