Nakalista eon man it sangka kumpirmadong kaso it Nipah virus infection sa Rajshahi Division, Bangladesh.
Suno sa International Health Regulations National Focal Point, ro pasyente hay naka-eksperyensiya it eagnat ko Enero ag nakumpirma ro impeksiyon pinaagi sa laboratory test makataliwan ro pilang adlaw.
Base sa imbestigasyon, owa imaw it travel history apang nagkaon it hilaw nga katas it date palm, nga kaeabanan nga ginahalinan it impeksiyon.
Suno sa Ministry of Health and Family Welfare it Bangladesh, sa 35 katawo nga nakasalamuha it pasyente hay hugut raya nga gina-monitor ag tanan hay nagnegatibo sa Nipah virus.
Kilaea ro Bangladesh nga nakaangkon eon it maisot nga outbreak it Nipah virus, kaeabanan kada Disyembre hasta Abril, kadungan it tiempo it pag-ani ag pagkonsumo it date palm sap.
Nagpatuman eon man it nagakaigo nga tikang ro health authorities it nasambit nga nasyon agud nga malikawan ro pagkalhit it sakit kaibahan ro maid-id nga surveillance ag pagtau it impormasyon sa publiko.
Sa makaron, ginakabig it World Health Organization nga manaba ro peligro it Nipah virus sa national, regional ag global level, ag manaba man ro posibilidad it pagkalhit kara sa ibang nasyon.
