KALIBO, Aklan—Nagapadayon ro imbestigasyon it Kalibo Police Station kaangot sa nasapwan nga patay nga eawas it sangka eaeaki sa sueod mismo it anang kwarto sa ginarentahang apartment sa may bahin it C. Laserna St., Kalibo.
Base sa report, ginkilaea ro biktimang si Jose Rodolfo Reoma, 26- anyos, sangka bank teller ag residente it Poblacion, Balete.
Sa inisyal nga imbestigasyon it pulisya, makapilang beses sigon nga nagpanuktok sa anang kwarto ro anang katrabaho apang uwa raya nagasabat rason nga nagdesisyon raya nga magpangayo it bulig sa tag-iya mismo it apartment agud nga mabuksan ro kwarto.
May kaangtanan kara, tumambad sigon kanda ro naga-eobog nga biktima rason nga ginpaeapitan raya it anang katrabaho ag ginpukaw apang uwa nagabugtaw ag nataeopangdan eon lang nga uwa nagaginhawa.
Ginpabutyag dugang nga uwa man sigon it senyales nga ginsueod ukon gintakawan ro biktima bangud nga intact pa ro anang mga importanteng kagamitan ag uwa man nakitaan it maskin anong lastro sa eawas ro biktima.
