KALIBO, Aklan— Daywa makaron ro nakapungko nga Mayor sa banwa it Malay kun sa siin nahamtang ro isla it Boracay sa pag-umpisa it term of office para sa mga nagdaog nga kandidato ko nagtaliwan nga mid-term election.
Raya hay matapos manumpa si Vice Mayor Frolibar Bautista bilang OIC Mayor sa atubang ni Department of Interior and Local Government (DILG) Malay Officer Mark Delos Reyes.
Kasunod raya sa pagbaton ni Bautista sa advisory ni Interior Secretary Eduardo Año ag Regional Director Ariel Iglesia nga imaw ro magabueos kay dismissed Mayor Ceciron Cawaling.
Samtang, gin-insister sa gihapon ni Cawaling nga indi imaw magapanaog sa pwesto nga nagpanumpa sa pwesto ko domingo nga adlaw, apang si Bautista ro magapirma it mga dokumento bilang Mayor samtang si number 1 councilor Niño Cawaling nga unga ni Ceciron ro magiging Acting Vice Mayor.
Nauna kara, nagpaandam ro DILG nga kasong Usurpation of Authority ro paga-atubangon ni Cawaling samtang Derelection of Duty man ro kay Bautista engkasong balewalaon it daywa ro nasambit nga mandu.
Nasayuran nga owa ginakilaea it DILG ro pagdaog ni Cawaling bangud nga may perpetual disqualification order kana ro Ombudsman.
