KALIBO, Aklan–Blangko pa ro barangay council it Mataphao, New Washington kung ano ro motibo sa pagbuoe sa lingganay nga nakabutang sa andang barangay chapel.
Suno kay Kagawad Henry Pelante nga ulihing nakit-an ro lingganay ko Sabado it hapon base sa pag-istorya it naka-duty nga Bantay Bayan.
Posible sigon nga gabi-i raya ginbuoe it mga suspek.
Dominggo it hapon eon suno kana kat matueopandan nga owa eon ro lingganay sa ginakahimtangan kara.
Insigida sigon nga nagreport kana ro nakaduty nga Bantay Bayan kung siin ginmanduan sanda it Barangay Kapitan nga magpa-blotter.
Mabahoe ro andang pagpati nga sangka grupo ro nagbuoe sa andang lingganay bangud masyado raya nga mabug-at ag indi masarangan hakwaton it hasta tatlong katawo.
Manaba eamang sigon ro nahamutangan kara sa gilid it simbahan.
Posible sigon nga gin-interesan ro andnag lingganay bangud makabig eon raya nga antigo.
Sa makaron, paealigban pa kung sin-o ro responsable sa pagpanakaw.
