Ginpasiguro ni Agriculture Secretary Francisco Tiu Laurel Jr. nga nagapabiling malig-on ro suplay it pagkaon sa nasyon sa pihak it pagtaas it presyo it produktong petrolyo tuga it nagalala nga gyera sa Middle East.
Suno sa Department of Agriculture (DA), uwa it kakueangan sa suplay it pagkaon ag bastante ro imbentaryo hasta sa Hunyo ukon maging sa Hulyo it presenteng dag-on.
Ginpahayag man it opisyal nga padayon ro ani ag may bastanteng reserba ro nasyon.
Partikular sa bugas, kon sa siin ginpahayag it National Food Authority (NFA) nga may kapin sa 400,000 metric tons nga buffer stock, nga bastante para pakan-on ro bilog nga nasyon sa sueod it napueong adlaw.
Dugang pa kara nga ginaeauman ro mas mataas nga suplay bangud sa presenteng anihan ag pagsueod it imported rice.
Nagpatuman man ro gobyerno it mga tikang agud mapabilin ro masarangan nga presyo, kaibahan ro mas hugot nga monitoring, pag-istudyo sa posibleng price cap sa imported rice, ag pagtanyag it mas baratong alternatibo sa pinaagi it Food Terminal Inc. ag Planters Products Inc.
