KALIBO, Aklan—Bawae sa gihapon mag-adto sa isla it Boracay ro mga lokal nga turista maghalin sa ibang probinsya.
Suno kay Madel Joy Tayco it LGU Malay nga sa makarun hay ro mga Aklanon eamang nga may importanteng pamanaw ag may transakyon ro pwedeng makasueod sa bantog nga isla.
Raya hay bangud ginalikawan ro pagkaangkon it masyadong crowded sa lugar.
Ginapahayag dugang nga ginalimitahan nanda makarun ro oras it pagsueod it mga tawo sa isla kung sa siin naga-umpisa it alas-6:00 sa agahon hasta alas -6:00 sa gabi-i.
Antes nga makasueod kinahangean eamang nga aywanan ro identification card (ID) sa port ag I-claim eamang kung mag-uli eun.
Bawae man ro pag-overtime bangud mag-euwas nga sarado ro mga hotel hay hugot man ginadumilian ro tanan nga mga aktibidad kapareho it pagpaligos.
Samtang, ginaeauman man nga posibleng magbukas eun para sa tanan ro Isla engkaso nga matapos eun ro covid 19 testing laboratory nga ginapatindog sa probinsya ukon makangkon it injection para pangotra sa makamaeatay nga virus.
