KALIBO, Aklan–Suportado it grupong Bagong Alyansang Makabayan ukon Bayan-Aklan ro pagpirma ni Pangueong Ferdinand “Bongbong” Marcos Jr. sa New Agrarian Emancipation Act.
Buot hambaeon kara, pagaduea-on it RA No. 11953 ro tanan nga owa nabayaran nga amortisasyon it principal nga utang kaeakip ro interes ag mga multa it ARB.
Suno kay Kim Sin Tuga, Provincial Coordinator it Bayan-Aklan nga ginakalipay nanda ro pagtao it importansya it presenteng administrasyon sa masobra tatlong dekada eon nga panawagan it nagkaeain-eain nga grupo it mga mangunguma sa nasyon.
Mabahoe sigon raya nga bulig sa mga benepisyaryo sa idaeom it Comprehensive Agrarian Reform Program.
Raya suno kana hay sangka pamaagi agud nga ipatuman ro matuod nga reporma sa eugta.
Sa pihak kara, owa man nalikawan ni Tugna nga ipahayag nga medyo na-expose ro peke nga kaundan it land reform program it gobyerno.
Gintaw-an nana it punto ro pagpabayad it amortisasyon ag buwis sa mga mangunguma kung siin owa man it ginatao nga suporta ro gobyerno agud nga mapataas ro produksyon it mga benepisyaryo.
