KALIBO, Aklan—Hugut nga ginpamaeabagan it grupong Alyansang Makabayan ukon Bayan-Aklan ro desisyon ni Pangueong Rodrigo Duterte nga pagpatindog it casino sa isla it Boracay.
Suno kay Mr. Kim Sin Tugna it Bayan-Aklan engkaso nga matabo posibleng maging pugad it nagkaeain-eain nga kreminalidad ro isla kapareho it prostitusyon ag illegal nga droga.
Ginpunto man kara nga indi eon kinahang-ean it Boracay nga butangan pa it casino bangud kilaea eon raya bilang sangka sikat nga destinasyon sa bilog nga kalibutan.
Dugang pa ni Tugna nga owa it kamatuoran ro ginpahayag it pangueo nga owa eon it pondo ro gobyerno bangud mismong Commission on Audit (COA) eon ro nagahambae nga may bastanteng pondo apang owa nagakaigo ro implementasyon kara kamana man nga masami nga ginagamit sa maeapnagon nga korapsyon.
Madumduman nga ko 2018 nagpaguwa ro Macau-based Galaxy Entertainment Group ag Filipino partner kara nga AB Leisure Exponent Incorporated it andang planong magpatindog it integrated resort-casino complex sa barangay Manoc-Manoc nga nagabalor it haeos tunga sa bilyong dolyar.
