KALIBO, Aklan—Major make-over ro ginahimo sa Kalibo Pastrana park nga gintaeanaan it minilyong piso nga pondo.
Suno kay Mark Sy, head it barangay affairs it LGU-Kalibo nga ‘by phase’ ro pagpatuman it rehabilitasyon nga nagatuyo nga makahimo it manami nga lugar, kun sa siin ro mga residente ag bisita hay makapamasyar, makapag-unwind, makapatigayon it mga aktibidad ag makahimo it mga handumanan nga magkaibahan.
Ro nasaksihan sigon makaron it publiko nga rehabilitasyon hay sa 1st phase pa eamang ag owa pa ro second phase.
Target sigon kara nga paga-ayuson ro ally it plaza kamana man nga mas pang pabahueon ro fountain.
Pila sa mga nakita nga dugang nga features sa plaza hay ro childrens playground, gym ag air conditioned nga covered court.
Posible suno kana nga maumpisahan ro phase 2 it proyekto pagkatapos eon it selebrasyon it Ati-Atihan festival.
Kaibahan kara ro pagbutang it lagoon nga may mga ornamental fish, pag-install it speaker ag mga solar lights.
Madumduman nga ro makasaysayan nga Kalibo Pastrana Park hay nauna eon nga gindeklara bilang municipal archaeological reservation site.
Ginmandu man suno kana ni mayor juris sucro ro pagbutang it mga pulis ag KAP members sa lugar agud nga matapna ro mga nagapangmalit ag pagsakay sa mga rides it mga adult ag iba pang in-house rules nga ginapatuman it MEEDO./
Magapatuman suno kana it hugut nga seguridad sa nakataeana nga opening of lights sa December 14.
