KALIBO, Aklan—Mag-eowas sa Covid-19 pandemic, nagapangatubang makaron sa krisis it kawad-an it dollar ro Beruit, Lebanon.
Suno kay Bombo International Correspondent Romelyn Ropa, tubong Brgy. Singay, Madalag apang presenteng nagatrabaho sa nasambit nga nasyon nga haeos tanan nga mga pumueoyo hay problemado bangud sa kawad-an it dollar, mahae nga baeak-eon ag kawad-an it trabaho.
Raya sigon ro nagtueod sa mga pumueoyo nga magpatigayon it hub-eag protesta agud nga mataeopangdan sanda it gobyerno ag isinggitan ro bukon it patas nga pagdumaeahan sa nasyon.
Ginpahayag dugang ni Ropa nga maabong Lebanesse ro nagiging bayolente bangud nga nagugutuman eon ro andang pamilya.
Bangud kara, uwa eon nasunod ro social distancing ag ro mandatory nga pagsuksok it face mask bilang precautionary measures kontra Covid-19.
Ro mga overseas Filipino workers suno kana may nagaabot it tatlo hasta limang buean antes nanda mabaton ro andang sweldo halin sa andang mga amo.
Kaeabanan suno kana sa mga nagahueag kontra sa gobyerno hay ginapakita ro pagiging bayolente sa pagsunog ag pagransak it mga kilaeang establisyimento rason nga maabo ro uwa eon nagasueod sa trabaho rason nga nagugutuman eon ro mga raya.
