KALIBO, Aklan–Kadungan it selebrasyon it Fire Prevention Month makaron nga buean it Marso, nagpatigayun man it nagkaeain-eain nga aktibidad ag programa ro Bureau of Fire Protection (BFP)-Makato.
Suno kay FO1 Kierwayne Pardeño, Public Information Officer it Makato Fire Station nga ko Marso 1 hay nagpatigayun sanda it motorcade ag ginsundan it safety advocy walk.
Mag-euwas kara, may pila man sanda nga gin-organisa nga simultaneous actity kamana man fire drill sa kabarangayan ag symposium sa mga pampublikong establisyemento.
Samtang, magapadyaun sigon hasta katapusan it buean ro pagpatigayun nanda it recorrida.
Nakasentro suno kana ro andang aktibidad sa fire safety bangud masami nga nakakalista it sunog kada buean it Marso kadungan it pag-umpisa it tag-init.
Sa pihak nga parte, gin-engganyo man kara ro mga pumueoyo nga maging vigilante ag magdahan sa tanan nga kahigayunan agud nga makalikaw sa mga insidente it sunog.
Agud nga masiguro ro kaeuwasan it pamilya, dapat sigon nga ro kada panimaeay hay magtaeana it fire safety equipment kapareho it fire extinguisher, firealarm, smoke detector ag fire exit.
Kamana man nga likawan ro paggamit ukon pagbakae it mga sub-standard nga electrical wire bangud masami raya nga ginahalinan it sunog sa mga residential area.
