BORACAY Island — Nagpaabot it sintemyento ro mga Ati sa isla it Boracay matapos nga ro andang ginahuptan nga eogta sa idaeom it Certificate of Land Ownership Award (CLOA) nga gintao it Department of Agrarian Reform (DAR) sa idaeom it administrasyon ni dating Pangueong Ferdinand Marcos Jr. hay inde eon sanda makasueod bangud sa gin-okupahan eon makaron it mga security guards.
Suno kay Maria Tamboon, livelihood coordinator it Boracay Ati Tribal Organization (BATO), nagakahangawa sanda makaron kon ham-an it ginsarado ro CLOA 5 ag inde eon sanda pagpasudlon agud nga mag-atipan sa andang mga pananom sa sueod it propyedad.
Raya hay matapos nga uwa pa sanda it nabaton nga finality of judgement, notice to vacate, writ of execution ag writ of demolition sa andang gindihon nga motion for reconsideration sa ginpapanaog nga notice of order it DAR
Suno kana, illegal ro pagsueod it mga security guards ag uwa it legal nga pahanugot bangud sa uwa pa it pinal nga desisyon ro korte sa motion nga gindihon it andang abogado.
Samtang sa pihak nga parte, ginpahayag ni Atty. Daniel Dinopol, legal counsel it Aeta Community nga klarong diskriminasyon sa kinamatarong it mga Ati ro natabo.
Suno pa kana, ro makahimo eamang kara hay ro sheriff it DAR apang ro sitwasyon makaron hay posibleng order eamang raya halin sa korporasyon nga claimant it eogta ag tax declaration eamang ro ginabuytan nga dokumento.
Ginpanindugan dugang ni Atty. Dinopol nga nakapending pa ro kaso bangud sa gindihon nanda nga motion for reconsideration ag uwa pa raya it pinal nga desisyon.
