KALIBO, Aklan — Buhos eon ro mga bakasyunista sa Isla it Boracay bangud sa long weekend kasunod it pagdumdum it All Saint’s ag All Soul’s Day.
Raya ro ginpahayag ni Jeane Pontero, special operation officer IV it Caticlan ag Cagban port.
Suno kana nga mas pa nga nag-doble ro numero it mga turista nga nagtabok sa Boracay umpisa makaron nga adlaw it Sabado, Nobyembre 1.
Sa makaron hay waea-tuo ro mga aktibidadis nga ginapatigayon sa isla bangud sa selebrasyon it Boracay White Beach Festival 2025.
Mag-eowas kara ro mga bars ag iba pang establisimento komersiyal hay may kanya-kanya nga gimik para sa Halloween party.
Gindugang pa ni Pontero nga base sa andang datos, nag-abot sa 5,619 ro mga turista nga nagtabok sa Boracay ko Oktubre 29.
Sa nasambit nga numero 651 ro foreigner, 4,914 ro local tourists ag 54 ro OFWs.
Nakalista man sanda it 11 trips it RoRo vessels halin sa pantalan it Batangas ag Mindoro vice versa.
Nagapabilin nga 5,000 hasta 6,000 ro average nga daily tourist arrivals sa isla ag ginaeauman nga magataas pa hasta sa Domingo nga adlaw, Nobyembre 2.
Ginpasiguro ni Pontero nga haum ro mga personnel it Caticlan ag Cagban port.
Abiso nana eabi eon sa mga first time sa Boracay nga pahaumon ro mga requirements agud nga indi ma-delay ro biyahe kapareho it hotel bookings ukon pwede man nga magpangayo it bulig sa andang assistance desk.
Operational man sigon ro andang mga CCTV cameras ag x-ray machines rason nga panawagan nana nga indi eon magdaea it mga bagay nga ginabawae agud nga indi madisturbo ro bakasyon ag pagbiyahe.
Engkaso nga maduea-an it gamit, insigida sigon nga i-report sa andang taeatapan ukon sa iba pang mga awtoridad.
Ginpasiguro man it mga kapulisan nga haum sanda agud nga masiguro ro kaeowasan it mga bisita.
