KALIBO, Aklan—Magabukas eun ro Isla it Boracay para sa mga pomoeuyo sa Rehiyon VI (Western Visayas) umpisa sa Hunyo 16.
Sa ginpatigayon nga press conference kahapon it Boracay Inter Agency Task Force (BIATF) sa Boracay kaibahan sanday Tourism Secretary Bernadette Romulo-Puyat, Environment Secretary Roy Cimatu ag Interior and Local Government Secretary Eduardo Año, ginkasugtanan eun ro pagbukas sa Isla para sa mga local tourist.
Suno kay Malay Mayor Frolibar Bautista nga sambilog sa mga igapatuman sa uman nga pagbukas it Isla ro “no booking no entry”.
Antes pagapasugtan nga makasueod sa Isla kinahangean nga magpakita anay it pamatuod nga nagpa-book eun raya.
Ginpahayag dugang nga kaibahan man sa mga gintalakay it BIATF ro mga igapatuman nga health protocol para sa kaeuwasan it mga turista nga nagaguwa ag nagasueod sa bantog nga Isla.
Ginpahayag dugang ni Mayor Bautista nga nakadepende man sa National task force kung pagapasugtan eun ro mga menor de edad ag senior citizen nga makapadueong sa Isla.
Raya hay matapos makit-an sa datos nga mabahoe ro pagnaba sa numero it turismo umpisa nga ginbawaean ro mga 21 anyos panaba ag 60 anyos pataas nga makaguwa sa andang panimaeay.
