KALIBO, Aklan—Nagapahaum eon ro mga hotel ag resort sa isla it Boracay sa uman nga pagbalik it mga dumueuong nga turista sa nasyon.
Suno kay Malay Tourism Officer Felix delos Santos, dere-deretso ro andang ginapatigayon nga pueong may kaangtanan sa basic occupational safety and health para sa kaeowasan it mga turista ag komunidad.
Maskin sigon nga nagpaguwa eon it guidelines ro national inter-agency task force, apang padayun pa ro pagbaeay kara it provincial governent ag LGU-Malay nga posibleng igapaguwa it technical working group hin-aga it Martes.
Umpisa sa Pebrero 10, 2022, ginduea eon ro mga quarantine protocols sa mga fully vaccinated nga foreign tourists ag returning overseas Filipino nga magasueod sa Pilipinas, apang kinahangean nga magpakita sa gihapon it negatibong resulta it RT-PCR test 48 oras antes ro pagbiyahe.
Antes sigon ro pandemya, top 10 sa andang tourist arrivals hay naghalin sa mga free ukon non-visa nga mga nasyon kapareho it South Korea, Japan, China, Vietnam, France, Malaysia, Australia, Finland, Thailand, United Kingdom, Germany, Italy, Sweden, Canada, Belgium ag iba pa.
Dugang pa ni delos Santos nga nagapadayun ro pagtau it booster shots kontra sa COVID 19 sa mga tourism workers ag residente it Boracay agud nga uman nga mapabaskog ro turismo ag ekonomiya.
Base sigon sa andang recovery and resiliency plan, kun owa it mga dumueuong nga turista sa Boracay, mabudlay ro andang uman nga pagbangon.
Masobra sa 30,000 bakasyunista ro nailista sa isla makaron nga Enero samtang ko Disyembre hay may kabilugan nga 113,000 nga arrivals.
Sa pihak nga parte, sa uman nga pagbalik sa national captal region ukon NCR sa alert level 2 umpisa hin-aga nga adlaw, ginaeauman ro uman nga pagdagsa it mga turista halin sa nasambit nga rehiyon.
