HEALTH News–Nagakabaeaka ro senado angot sa report nga kakapusan it supply it bueong nga antiretroviral sa ap-at nga rehiyon sa nasyon rason nga gina engganyo ro Department of Health (DoH) nga insigidang aksyunan ro nasambit nga isyu.
Suno sa advocacy group nga Network Plus Philippines, ro mga tawong nagakabuhi nga may HIV sa mga rehiyon it Cagayan Valley, Central Luzon, Bicol, ag Central Visayas hay una sa “life-and-death situation” tuga it kritikal nga kakueangan it mga bueong nga ARV, nga masyadong importante para sa pagdumaea it andang kahimtangan.
Suno kay Senador Christopher “Bong” Go, tagapangueo it Senate committee on health nga indi dapat nga makaangkon it pagkabaeaka ro mga Filipinos bangud sa kakueangan it andang life-sustaining medication.
Nagapanawagan imaw sa DOH ag sa Philippine National AIDS Council nga maghueag it madalian ag solbaron ro nasambit nga isyu.
Ginbulgar it Network Plus Philippines nga ro mga pasyente nga may HIV hay nagabaton eamang it sangka bote ukon mas sangkiri nga mga bueong nga ARV.
Manaba sigon raya sa kaeabanan nga supply nga tatlong bote nga katumbas it three-month medication regimen.
Bangud kara, ro pilang pasyente hay ginhambaea nga magpahaum agud nga magbakae it kaugalingon nanda nga bueong bangud sa kakueangan it stock.
