KALIBO, Aklan—Posibleng antes ro buean it Hulyo hay mabuksan eon ro daywang paeuparan sa probinsiya it Aklan.
Suno kay provincial administrator Atty. Selwyn Ibarreta nga maabu eon nga mga pumueuyu ag airlines company ro nagahinyu nga mag-operate eon ro Kalibo International Airport ag Caticlan Airport para sa mga domestic passenger.
Kahapon hay uman nga nagpatigayon sanda it inspeksyon sa paeuparan agud nga masiguro ro kahauman kara.
Nauna eon nga ginpahayag ni Civil Aviation Authority of the Philippines ukon CAAP-Aklan manager Engr. Eusebio Monserate Jr. nga haum eon ro airport nga magbaton it mga pasahero engkaso nga imandu it provincial government ro pagbalik it mga commercial flights.
Nasayuran nga nagpatigayon man it simulation exercises para sa new normal departure ag arrival procedures kaibahan ro PNP Aviation Security Group ag Office of the Transportation Security.
Pila sa mga health protocols nga dapat sundon hay ro mandatory temperature screening antes nga makasueod sa airport terminals, nakasuksok it face masks ag pag sanitize sa tanan nga oras ag pagsunod sa social distancing.
Gina-abisuhan man ro mga pasahero nga magkaon it bastante bangud nga ro mga airline company hay naga-offer eamang it mga bottled water ag pre-order nga in-flight meals.
Dapat man nga magdaea it kaugalingon nga ballpen sa pag-fill-up it mga forms eabi eon sa health declaration card.
I-check ro flight status antes nga maghalin sa baeay, dapat hay sa airport eon tatlong oras antes ro flight ag i-check ro tanan nga mga regulasyon it gobyeerno agud nga masiguro nga makasabat sa requirements.
