Arestado ro billionaire founder ag CEO it sikat nga messaging app nga telegram nga si Pavel Durov, sa Bourget airport, Paris kabie.
Ginpanaog it France ro arrest warrant kay Durov matapos maghimo it preliminary investigation ro mismong nasyon kaangot sigon sa multiple scams ag pagka envolved kara sa pagkalat it saea nga impormasyon umpisa ko inatake it Russia ro Ukraine.
Sa report halin sa sangka French commercial television network, ro app ni Durov sigon ro nagapanguna nga komunikasyon it Ukrainian President nga si Volodymyr Zelensky ag anang mga opisyal.
Raya man sigon ro ginagamit it Russia para magpakalat it mga balita kaangot sa gyera rason nga nagapabilin ro mismong app bilang nagapanguna nga messaging app it mga pamueoyo it Russia kaangot sa nagapadayon nga gyera sa tunga it daywang ka nasyon.
Tinawag man ni Russia’s representative to international organisations sa Vienna, nga si Mikhail Ulyanov ag iba pang mga kaibahan kara sa Russia ro pagkadakop kay Durov bilang sangka klase sigon it diktadurya sa ana kara nga kadapatunan.
Maski uwa pa it pahayag ro France sa nasambit nga isyu hay ginaingganyo man ni Ulyanov ro mga pamueoyo kara nga mag protesta sa French embassies sa bilog nga kalibutan.
