KALIBO, Aklan — Kinasuhan eon ro Chinese national nga naaresto sa pagbaligya it mga pekeng gadgets.
Ro pagpasaka it kaso kontra kay Yunzuo Huang, residente it Zhejiang, China hay bangud sa modus karang naga pakitluoy nga owa it pambakae it plane ticket pabalik sa andang nasyun bangud sa pagkapierde sa casino.
Kasunod kara ro pagtanyag it anang laptop ukon Iphone nga peke.
Naga pangatubang sa kasong pag eabag sa RA 7394 ukon Consumers Act of the Philippines ro nasambitang estranghero.
Sangka manugturo sa Ibajay, Aklan ro sambilog sa mga nagreklamong nabiktima it estranghero nga nakabakae it cellphone sa haegang P15,000.
Pilang turista man sigon sa isla it Boracay ro gin hana karang biktimahon.
Ro mga narekober nga pekeng gadgets maghalin sa suspek ro pagagamitong ebidensiya kontra kana.
Sa makaron hay gina estudyuhan pa it otoridad kun may kasabwat ro estranghero sa anang modus.
