KALIBO, Aklan—Uman nga nag-apela it pag-intindi sa mga examinee ro Civil Service Commission matapos nga ginkansela it ahensya ro nakataeana kunta nga civil service examinations makaron nga dag-on.
Suno kay Ferdinand Macogue it CSC-Aklan, uwa man sigon ginpangayu-a ro pandemya kon sa siin bukon eamang it examination ro nakansela makaron nga dag-on kunding maging ro mga maeagkuan nga event ag activities.
Ginpakamayad sigon it komisyon nga kanselahon ro civil service examinations via Pen-and-Paper Test bilang pagsuporta eon man sa gobyerno sa padayon nga pagsukoe sa Covid-19 pandemic.
Raya hay sandig sa CSC Resolution No. 2000596 nga ginpaguwa ko Hunyo 16.
Mag-eowas sa Career Service Examination-PPT Professional ag sub-professional sa August 9 hay kanselado man ro June 21 Fire Officer Examination; Penology Officer Examination ag Basic Competency on Local Treasury Examination.
Ginkansela dugang it CSC ro pagpatigayon man it October 11 Intermediate Competency on Local Treasury Examination; Pre-Employment Test; Promotional Test ag Ethics-Oriented Personality Test.
Samtang, ro March 15, 2020 CSE PPT hay gin-re schedule sa masunod nga dag-on.
Nasayuran nga bangud sa pandemya hay bukon eamang it examination ro nakansela kundi maging ro mga maeagkuan ag international activities.
