KALIBO, Aklan–May kabilugan nga 418,170 nga rehistradong botante para sa barangay elections samtang 149,082 mat-a ro mga nakarehistrong youth voters sa bilog nga probinsiya it Aklan para sa nagahilapit nga barangay and SK elections sa Oktubre 30, 2023.
Raya hay base sa official list of voters nga ginpaguwa ni Atty. Roberto Salazar, provincial election supervisor bilang kaparte it andang pagpahaum sa maabot nga eleksyon.
Ko Hulyo 19 suno kana hay natapos it election registration board ukon ERB it tanan nga mga banwa sa aklan ro verifications ag certification it Election Day Computerized Voters Lists ag Posted Computerized Voters Lists.
Dugang pa ni Atty. Salazar nga ko Hunyo 19 hay nagpatigayon man sanda it cleansing kun sa siin ginmanduan ro ERB nga boe-on sa listahan ro pangaean it mga rehistradong botante nga nag-transfer eon, may doble ukon multiple registration records bangud sa Automated Fingerprint Identification System, mga botanteng namatay ag ro mga may una nga court exclusion order.
Gindugang pa nga ro mga indibidwal nga nakabo-oe it court inclusion order ag ro mga nabo-oe sa listahan pinaagi sa Automated Fingerprint Identification System bangud sa saea nga encoding it type of application sa voter registration system hay gin-eakip sa listahan it mga botante.
Ginpaathag pa ni Atty. Salazar nga sa Voter’s Registration Act, ginamanduan ro election registration board nga magpahaum ag magpaskil it certified list it mga botante 90 diyas antes ro pagpatigayon it eleksyon.
