KALIBO, Aklan — Temporaryo nga ginsaylo it Commission on Elections (Comelec) Kalibo sa mas mabahoe nga lugar ro voter registration partikular sa ground floor it new building it munisipyo sa may Magsaysay Park agud nga ma-accommodate ro dagsa it mga last-minute registrants bago ro gintaeana nga deadline makaron nga adlaw it Lunes, Mayo 18.
Suno kay Atty. Christian Itulid, municipal election officer it Kalibo nga umpisa ko Biyernes nga adlaw hay ginbutang nanda ro registration sa nasambit nga lugar ag nagdugang it mga kagamitan agud nga mapadasig ro proseso ag malikawan ro grabeng pagdueutdutan it mga aplikante.
Ideal sigon ro nasambit nga lugar bangud nga makasarang raya nga magbaton it mataas nga numero it mga nagapa-rehistro kumpara sa andang opisina nga masyadong maisot.
Bangud sa gintaeana nga deadline, naghaba ro pila it mga botante sa andang opisina rason nga nagpatuman sanda it dugang nga tikang agud nga mapabilin ro kaayusan ag kaeowasan it publiko .
Ginklaru nana nga ro temporaryong pagsaylo sa mas mabahoe nga venue hay kaparte it andang tikang agud nga maserbisyuhan ro mas maaabu nga aplikante nga gustong magparehistro eabi eon makaron nga adlaw Lunes agud nga makaboto sa paeaabuton nga Barangay ag Sangguniang Kabataan Elections sa buean it Nobyembre.
