KALIBO, Aklan – – – Multiple stab wounds ro gin-angkon it sangka construction worker matapos nga ginbuno it uwa pa nakilaea nga suspetsado sa barangay Balabag, Boracay.
Ro biktima hay nakilaea kay Azur Imaw, sa legal nga pangidaron.
Ginasugid nga nasayuran eamang it anang mga katrabaho nga nabun-an eon ro biktimang si Imaw ag inde matumod kung sin-o ro suspek.
Makatatlong beses nga ginbuno ro biktima nga nag-angkon it igo sa anang tu-o nga kilid, likod ag dughan.
Insigida raya nga gindaea sa sangka clinic sa isla it anang mga kaibahan apang gilayon man nga gin-refers sa Aklan Provincial Hospital.
Sa makaron hay padayun nga gina-obserbahan sa Intencive Care Unit ukon ICU it ospital ro biktima matapos nga ginasugid nga naabot ro baga kara.
Samtang, nagapadayun man ro imbestigasyon it Boracay Tourist Assistance Center ukon BTAC agud nga matumod ro suspek sa nasambitang insidente.
