KALIBO, Aklan — Patay ro sangka construction worker sa Boracay bangud sa dengue.
Namatay ro biktimang si Arnold Tenorio, 35, residente it Brgy. Mina-a, Ibajay, Aklan, Sabado it aga-aga samtang ginabueong sa Intensive Care Unit (ICU) it Aklan Provincial Hospital.
Sambilog imaw sa 4,679 nga kaso it dengue nga nailista sa bilog nga probinsiya it Aklan umpisa Enero hasta Agosto 24 makaron nga dag-on. Imaw man ro pang-20 nga namatay bangud sa sakit.
Ginsaysay ni Shamine Tenorio, asawa it biktima, umuli ko Huwebes halin sa Boracay ro anang mister nga may eagnat ag masakit ro tiyan.
Pagka-aga hay ginpa-check-up raya eagi sa andang district hospital ag idtu eon nakitang bumagsak ro anang platelet count.
Insigida raya nga ginsueod sa ICU it Aklan Provincial Hospital apang binawian man it hueam nga kabuhi.
Nagapati ro anang pamilya nga sa gina-istaran nga barracks it andang construction site sa Boracay nana nabo-oe ro sakit.
