Convicts nga nagsurender sa Aklan, nag-abot eon sa 9
KALIBO, Aklan — Naga-abot eon sa siyam ro nagsurender nga mga convicts sa nagkaeain-eain nga police stations sa Aklan nga napahilway bangud sa good conduct time allowance (GCTA) law.
Nasayuran nga hasta hin-aga nga adlaw eon lang it Huwebes magatapos ro 15 diyas nga ultimatum nga gintau ni Pangueong Rodrigo Duterte para sa mga napahilway nga magsurender agud nga ma-recompute ro andang time allowances.
Base sa record it Aklan Police Provincial Office (APPO), tatlo ro nagsurender sa Lezo Police Station, daywa sa Balete, tig sambilog sa Tangalan, Makato, Malinao ag Malay.
Haeos tanan sa mga raya hay na-turn-over eon sa Bureau of Corrections (Bucor).
Padayun ro pag-apela it kapulisan sa iba pang mga preso sa probinsiya nga boluntaryo eon nga magsurender sa maskin siin nga police stations nga sakop it APPO samtang owa pa natapos ro gintau nga palugit it pangueo.
