KALIBO, Aklan—Activated ro local COVID-19 task force it lokal nga gobyerno it Malay, Aklan agud nga mas pang mapabaskog ro monitoring agud nga malikawan nga makasueod sa andang hurisdiskyon ro coronavirus disease ukon COVID 19.
Raya hay kasunod it pagbutang ni Pangueong Rodrigo Duterte sa Pilipinas sa idaeum it State of Public Health Emergency ag code red sub level 1 it Department of Health ukon DOH.
Suno kay Malay mayor Frolibar Bautista nga mabahoe ro tyansa it pagkalhit it virus bangud sa nailistang kaso it local transmission.
Mabahoe eon sigon ro naging epekto kara sa industriya it turismo eabi eon sa Boracay bangud sa mga ginpatuman nga travel ban sa mga nasyon nga may mataas nga kaso it makamaeatay nga virus.
Gindugang pa ni mayor Bautista nga ginpueong eon nana ro andang Municipal Disaster Risk Reduction and Management Office ag andang Health Office angot sa mga dapat nga obrahon sa pag-transport paagto sa ospital sa mga ginadudahan nga naga-angkon it virus ukon mga ginakabig nga persons under investigation ag persons under monitoring.
Mag-eowas kara, nakabantay man sigon ro andang mga gintukod nga Barangay Health Emergency Response Team nga ginaeakipan it 2 BHWs ag barangay tanod agud nga magbulig sa gobyerno sa pagbantay ag pagtapna it pagkalhit it virus sa mga komunidad.
Nagapanguna sigon nanda nga obligasyon ro pag bisita sa mga nag-abot nga pasahero halin sa mga nasyon nga infected it coronavirus disease.
