KALIBO, Aklan—Samtang uwa pa it ginapaguwang mandato ro Department of Tourism (DoT) kaangot sa plano kara nga pagbawae sa pagbisita it mga cruise ship sa isla it Boracay, sangka cruise liner ro nagdungka sakay ro libo-libong mga turista.
Ginkalipay it 2,000 pasahero nga puro mga Chinese national ag 1,000 crew it MS Voyager of the Seas ro mainit nga pagsug-aeaw kanda it Ati-atihan tribe, pilang miyembro it DoT, Aklan Provincial Government ag Local Government Unit (LGU)-Malay sa Cagban Port sa nasambitang isla.
Nag-enjoy ro mga dumueoong nga turista sa pagpanikangon sa long white beach, pagsueod sa mga souvenir shops ag pagpatigayon it island hopping activities.
Ro nasambitang cruise ship hay nag-eayag halin sa Singapore agud libuton ag ipamasyar ro mga pasahero kara sa nagkaeain-eain nga sikat nga lugar sa bilog nga kalibutan.
