KALIBO, Aklan — Balik sa isla it Boracay ro dating hepe it Boracay Tourist Assistance Center (BTAC) nga si P/Major Jess Baylon agud nga magpungko nga hepe it Malay Police Station.
Epektibo ko Hunyo 4, si Baylon hay uman nga gintaeana sa banwa it Malay nga imaw ro may hurisdiksyon sa isla. Ginbayluhan nana si P/Captain Jose Mark Anthony Gesulga.
Ginpahayag ni Baylon nga masadya imaw nga uman nga nakabalik sa ikaywang kahigayunan sa banwa it Malay bangud nga uman sigon kara nga maserbisyuhan ro nasambit nga banwa eabi eon ro sikat nga tourist destination nga Boracay.
Mag-eowas sa peace and order, pagatutukan man sigon kara ro kampanya kontra sa iligal nga droga ag kriminalidad.
Si Baylon ro dating hepe it BTAC kat mabaril kara ro sangka drug suspek nga si Rafe Diamante, 35, tubong Nueva Valencia, Guimaras ko 2017.
