Kalibo Aklan ——Naging maayos ro ginpatigayon nga daywang adlaw nga dry run para sa uman nga pagbukas it tourism operations sa Isla it Boracay .
Suno kay Malay Mayor Frolibar Bautista nga sa lunes hay uman sanda nga magapatigayon it pueong kaibahan ro Provincial Inter Agency Task Force on COVID- 19 sa pagpanguna it Chairman nga si Governor Florencio Miraflores agud nga masayuran kon ano pa ro mga kakueangan.
Nasayuran nga nagpatuman it mga polisiya ag interventions ro PIATF agud nga masiguro nga masunod ro mga health protocols agud nga malikawan ro pagkalhit it coronavirus disease (COVID- 19).
Mag-eowas sa mandatory nga pagsuksok it face mask, hugut nga ginpatuman ro physical distancing halin sa paeuparan hasta sa pantalan kamana man ro pagsakay sa sea ag land transport.
Ginpamilit pa ni Bautista nga ro mga establisimento eamang nga makasunod sa requirements it Department of Tourism ag LGU Malay ro pagapasugtan nga uman nga makabukas ag maka-operate .
Kinahangean it mga raya nga magsekyar it Certificate of Authority to Operate halin sa DOT ag Mayors permit .
Maskin sa pagpaligos sa baybay hay dapat nga may daywang metro ro antad sa kada isaea ag antes nga mag-eusong sa tubi hay dapat nga nakapahistro sa mga life guard station sa mga gintaeana nga swimming areas ag gina-check ro body temperature .
Sa mga dine in restaurants , 50 % it capacity ro gina-require agud nga makaangkon it haeuga nga dining area mag-eowas pa nga dapat nga magpatuman it one entry one exit policy .
Samtang, ginpasiguro ni Mayor Bautista nga pagapamatian ro hinyu it mga stakeholders sa Isla agud nga mabuligan man ro mga raya nga mapahagan-hagan ro epekto it COVID-19 crisis matapos nga owa pa haeos nakabangon sa an-um nga buean nga Boracay closure .
Nauna eon nga nag-apela ro Boracay Foundation Incorporated (BFI), grupo it mga negosyante sa Isla nga indi anay sanda pagsukton it buwis sa masunod nga dag-on.
