KALIBO, Aklan—Kapin sa daywang ka cruise ship ro nag-abot sa isla it Boracay sa sueod it sang dominggo makaron nga buean it Pebrero.
Suno kay Nieven Maquirang, officer-in-charge of the Port Cruise Ship Operation and Special Project, raya ro resulta sa pagtinguha it lokal nga gobyerno it Malay, stakeholders ag iba pang natungdan nga ahensya it gobyerno nga ma-showcase ro Boracay bilang sambilog sa mga nagapangunang destinasyon it mga nagaeayag nga cruise ship.
Angot kara, unang umabot ko adlaw it dominggo ro MV Norwegian Jewel sakay ro kapin sa 2,700 ka mga pasahero.
Sa nasambit nga numero haeos 95 porsyento ukon kapin sa 2,527 sa mga raya ro nagpanaog sa barko ag ginbuoe ro kahigayunan nga matan-aw ag malibot ro kaanyag it isla.
Samtang, ko adlaw it Martes, uman nga nagbalik ro MV Westerdam sakay ro 1,900 nga mga pasahero kon sa siin 1,700 sa mga raya ro nagpanaog sa cruise ship.
Ginpahayag dugang ni Maquirang nga sakay it daywang ka cruise ship ro mga European, American ag Asian tourist kon sa siin nakitaan ro mga raya it manami nga expression sa andang pag-abot sa Boracay.
Samtang, sa pagbalik sigon it international vessel sa Boracay hay may mga maeagkuang kompanya nga nagpaabot it interes ag suporta nga mabutangan eon it docking facilities para sa mga cruise ship ro banwa it Malay nga posibleng ibutang sa may bahin it Caticlan.
Ro magkasunod nga cruise ship hay pag-ap-at eon sa listahan nga nag-abot sa Boracay halin ko buean it Enero it presenteng dag-on.
Eauman pa suno kay Maquirang ro iba pang international vessel nga naka-skedyul nga mag-abot sa isla it Boracay.
