KALIBO, Aklan—Aksidenteng bumangga sa sangka pampasaherong L300 van ro sangka pick up nga saeakyan sa daeanon nga sakop it Brgy. Habana, Nabas.
Ginkilaea ni P/Cpl. Andrew Andrade it Nabas Police Station ro driver it L300 van kay Anthony Narciso, 43-anyos, residente it Brgy. Cabayugan, Malinao samtang ro driver mat-a it pick up hay nakilaea kay Norman Menor, 35-anyos, residente it Osmeña Avenue, Brgy. Estancia, Kalibo.
Suno kay P/Cpl. Andrade nga maghalin sa banwa it Kalibo ag magapaadto kunta sa Brgy. Caticlan ro L300 van nga may sakay nga an-om ka mga pasahero.
Kung siin pag-abot sigon sa nasambitang lugar hay gulpi eamang nag-overtake sa kasunod nga saeakyan si Menor rason nga dumiretso ag bumangga raya sa van.
Natueopangdan nga maghalin sa banwa it Malay si Menor ag magapauli eon kunta sa banwa it Kalibo kat matabo ro banggaan.
Insigida nga gindaea sa Malay Municipal Hospital ro mga pasahero it L300 van kamana man ro daywang ka mga nasambitang driver.
Angot kara, nagkasugot eon man ro magtimbang nga parte kung siin nagpromisa si Menor nga pagasabton kara ro tanan nga danyos ag kasamaran tuga it aksidente.
