KALIBO, Aklan — Ginkalipay it Barangay Council it Andagao, Kalibo nga sa andang lugar ginlunsar it Department of Health ro kauna-unahan nga “PuroKalusugan” program sa probinsiya it Aklan ko Martes nga adlaw, Agosto 13.
Suno kay punong barangay Juliet Melgarejo it nasambit nga lugar nga ro PuroKalusugan hay ro pinakabag-o nga primary care program it ahensiya nga nagatuyo nga maihatud ro serbisyong pang-ikamayad nga eawas sa komunidad pinaagi sa pagdaea kara sa mga kabarangayan.
Ginpahayag it opisyal nga mabahoe ro naging benepisyo kara sa andang mga pumueuyu ag iba pang mga kabarangayan sa banwa it Kalibo kun sa siin, nag-abot sa masobra sa 100 ro naserbisyuhan.
Pila sa mga gin-offer nga serbisyo hay ro immunization, oral health, maternal health, tuberculosis control program, nutrition, non-communicable disease prevention and control program, ag ro environmental and sanitation services.
Mag-eowas nga libre ro check-up hay nagtau man it libre nga bueong .
Ro PuroKalusugan program suno kana hay pinaagi sa pagbueuligan it DOH, provincial government it Aklan, local government unit it Kalibo, ag iba pang partner stakeholders nga igapadayun eon sa masunod nga mga inadlaw.
Sa pihak nga parte, ginkumpirma ni Kapitan Melgarejo nga kaibahan ro Barangay Andagao nga nakalista it maabu nga kaso it dengue.
Sa kamatuoran suno kana nga ro iba pa sa mga raya hay owa eon nailista matapos nga owa nagpadaea sa ospital ag sa baeay eon lang nagpamayad.
Bangud kara, nagpanawagan imaw sa mga residente nga pirmeng i-praktis ro “4S” strategy partikular ro pag-limpyo sa palibot eabi eon ro mga gina-pamugaran it mga namok.
Nagpatigayon eon man sigon it fogging ukon spraying sa andang lugar partikular ro mga lugar nga may nai-report nga dengue cases .
