Kalibo Aklan ——Ginapahauman eon makaron it Department of Education (DepEd-Aklan) ro learning system nga igapatuman sa “new normal” kasunod it anunsyo it National Government nga pagaboe-on eon sa General Community Quarantine ro bilog nga probinsya it Aklan.
Suno kay Assistant Schools Division Superintendent Jose Niro Nillasca it DepEd-Aklan, sa Agosto 24 eon nakataeana nga magabukas ro klase sa tanan nga mga pampublikong eskwelahan apang mabahoe ro igabag-o pag-abot sa learning system it mga estudyante bangud nga ginalikawan kara ro face to face encounter sa tunga it mga estudyante ag manugturo.
Ginapanan-aw sigon makaron sa tyempo it pandemya nga makabulig it husto ro online learning apang maabo pa ro dapat nga ikonsidera bangud nga bukon it syento porsyento it mga learners hay may access sa internet.
Ginpasiguro it opisyal nga ro pinaka-most essential learning competencies ro igaturo it mga manugturo pinaagi sa modular learning, online learning ag printed materials.
Apang kon inde malikawan ro face to face learning hay maga-set sigon kara ro ahensya it limitasyon.
Samtang, magabag-o man ro grading system nga pagasundon it mga manugturo kasunod it new learning system nga igapatuman.
Aminado si Nillasca nga bukon it madali para kanda ro tanan apang kinahang-ean nga sundon para sa kaeowasan it mga estudyante, manugturo ag bilog nga komunidad.
