KALIBO, Aklan—-Punterya makaron it Department of Eduaction (DepEd) nga buhinan ro numero it asignatura it mga estudyante sa Senior High School (SHS) curriculum ag himuon eon lang nga 5 ukon 6 nga subjects.
Suno kay Mar Bien Gregory Parel, division information officer it DepEd Aklan nga ginatun-an raya makaron it ahensya sa tuyo nga mapataas pa ro tiyansa it mga estudyante nga ma-hire it mga employer.
Ro pagbawas sa mga asignatura sa Senior High School hay makapamayad agud nga makapokus ro mga estudyante sa mismong subjects nga matun-an it husto nga magiging kinahang-ean it mga raya sa andang pag-usoy it trabaho ag sa pang-adlaw-adlaw nga pagpangabuhi.
Mag-eowas kara, magatao man it mas maabong oras para sa on-the-job training nga makapamayad pa it employability ukon ikasarang nga ma-hire sa trabaho ro Senior High School graduates maskin nga uwa pa sanda it work experience.
Ro pag-review it nasambit nga curriculum para sa Senior High School ukon Grade 11 hasta 12 hay nagapadayon samtang amat-amat nga ginapatuman hasta sa 2028 ro K-10 curriculum nga magatutok sa literacy ag math skills it mga estudyante.
Sa makaron, may 17 core curriculum subjects sa Senior High School program.
