KALIBO, Aklan — Nagpaandam ro Department of Health (DOH)-Aklan sa padayun nga pagtaas it kaso it dengue makaron nga tiempo it tag-uean sa probinsiya it Aklan.
Raya hay matapos nga makalista ro Provincial Health Office (PHO) it 1,143 umpisa Enero 1 hasta Hulyo 27, 2024.
Sa datos nga ginpaguwa it PHO-Aklan, mas mataas ro nasambit nga numero it 75% kumpara sa mga nai-record nga kaso sa kaparehong period ko 2023 nga kapin sa 652 eamang .
Mag-eowas kara, nakaangkon man it kaso ro tanan nga 17 nga banwa sa probinsiya.
Pinakamaabung nai-record nga kaso it dengue sa Kalibo nga may 196 nga kaso ukon 34%, kasunod ro Malay nga may 192 nga kaso ukon 1,377% ag ikatlo ro Nabas nga may 89 ukon 39%.
Umpisa ko Hulyo 21 hasta Hulyo 27, kapin sa 154 ro bag-ong kaso it dengue nga nailista.
Sa bilog nga Aklan, nakalista eon it sambilog nga namatay sa sakit nga ginasugid nga sangka senior citizen.
Angot kara, ginpadumdum ni DOH-Aklan Disease Surveillance Officer Ma. Elma Mae Pendon ro publiko nga sundon ro 4S para suk-ean ro dengue nga ginaeakipan it Search and Destroy ukon usuyon ro gina-istaran it mga namok; Self-Protection ukon magsuksok it mahabang eambong ag gumamit it insect repellant; Seek Early Consultation ukon magpa-check-up eagi sa doktor kun may sintomas it dengue; Support Fogging/Spraying ukon suportahan ro fogging ukon spraying sa mga lugar nga may mataas nga kaso it dengue.
Suno kana nga kadungan it pagsueod it tiempo it tag-uean hay nagataas man ro kaso it dengue.
Posible man sigon nga pila sa mga nakaangkon it sakit hay nagmayad eon apang ulihi gin-record.
Samtang, pinaka-epektibo sigon nga pamaagi agud nga matapna ro sakit hay ro pagpatay mismo sa mga namok.
