Ginpasiguro it Department of Health (DOH) nga kontrolado it ahensya ro pagtaas it kaso it Monkeypox (Mpox) sa nasyon sa pihak it uman nga pagsikad it numero kara sa pilang lugar.
Suno kay Health Secretary Teodoro Herbosa, mas manaba gihapon ro numero it mga kaso makaron nga dag-on kumpara sa parehong tyempo ko 2024.
Dugang pa ni Herbosa nga ginpabaskog eon it DOH ro kampanya sa edukasyon, pagbueong, ag isolation agud mapunggan ro pagkalhit it sakit.
Samtang, uwa man gintumod it opisyal kon siin nga mga lugar naireport ro mga bag-ong kaso it Mpox, apang ginpahayag nana nga ro mga raya hay una sa Clade II variant, nagakahueogan nga mas mild ag ordinaryo nga kusang nagamayad ag uwa nagakinahang-ean it maeapnagong intervention.
Ginkumpirma man it DOH nga bukon it kaibahan ro Pilipinas sa mga nasyon nga sakop it Public Health Emergency of International Concern nga gindeklara it World Health Organization (WHO), nga naka-sentro eamang sigon sa mas makataeapon nga Clade Ib variant.
