Pareho nga owa it impormasyon ro Department of Justice (DOJ) ag ro Department of the Interior and Local Government (DILG) angot sa ginasugid nga pagka-aresto kay Sen. Ronald “Bato” Dela Rosa.
Raya ro sabat it daywang ahensya umpisa nga nagkalhit ro istorya kahapon it hapon nga gina-alegar nga nadakpan eon ro pugante nga senador.
Sa press conference it Justice Department, nagpahayag ro spokesperson nga si Atty. Polo Martinez nga owa imaw it makumpirma nga detalye sa nasambit nga alegasyon bangud owa pa it nabaton nga report ro ahensya.
“I cannot confirm that information. At least, not yet. Wala pa po kaming natatanggap na nangyari ‘yan,” suno kay Martinez.
Ginklaro man ni Interior Secretary Jonvic Remulla nga sa parte it Philippine National Police (PNP), owa man it nabaton nga kapareho nga impormasyon.
“As far as the PNP, we have no information to that effect,” pahayag it sekretaryo.
Sa parte man it National Bureau of Investigation (NBI), “owa” man ro naging sabat ni Director Melvin Matibag kat ginpangutana raya angot sa nasambit nga report.
“Hindi, wala. Sa amin wala. I don’t know kung sino nakahuli. Wala sa amin,” suno kay Matibag.
Kat ginpangutana kun padayon ro manhunt, sabat kara: “Lagi naman.”
Madumduman nga ko Mayo 11, kadungan it pagbalik ni Dela Rosa sa Senado, ginkumpirma it International Criminal Court (ICC) nga nagpaguwa eon sanda it arrest warrant kontra sa former PNP Chief.
Raya hay may kaangtanan sa anang papel bilang alleged co-perpetrator ni former President Rodrigo Duterte nga may kaso nga crimes against humanity sa ICC bangud sa anang drug war.
Ko Mayo 13 it gabi-i, may kontrobersyal nga eukpanay nga natabo sa Senado, ag ko Mayo 14 it aga-aga, nakapaeagyo si Dela Rosa pinaagi sa pagsakay sa saeakyan ni Senator Robin Padilla.
Ginpamalibaran man si Padilla nga nagpaeagyo sanda bangud suno kana, maskin nga i-review sa CCTV, makit-an nga nagatikang eamang sanda ko rato nga tiempo.
