Kalibo Aklan —— Ginkumpirma ni Civil Aviation Authority of the Philippines (CAAP)-Aklan General Manager Engr. Eusebio Monserate Jr. nga ginapasugtan eon ro domestic flights nga makabiyahe sa mga lugar nga una sa idaeom it General Community Quarantine (GCQ).
Apang, ginklaro kara nga dapat parehong una sa GCQ ro paadtunan it mga flight bangud hugot pa nga ginabawaean kon sa idaeum it Enhanced Community Quarantine (ECQ) ro sangka lugar.
Ginpahayag dugang ni Engr. Monserate nga ginakonsidera gihapon ro health protocols sa pagbukas it operasyon sa mga paeoparan kaparehas it pagsuksok it Personal Protective Equipment (PPE’s) ag pagsunod sa social distancing.
Sa pihak kara, ginpahayag ni Engr. Monserate nga uwa pa it airline companies nga nagproponer it andang domestic flight sa Kalibo International Airport.
Posible suno kana nga gina-istudyuhan pa it mga raya kon angay ag bagay eon nga magbyahe ro andang mga eroplano nga inde man sanda malugi sa tunga it ginapangatubang nga krisis tuga it COVID-19 pandemic.
Madumduman nga bangud sa pandemya hay haeos tanan nga mga flights sa nasyon hay nasuspinde bangud sa pagpatuman it Community Quarantine halin ko buean it Marso.
