Naglunsar ro Department of Trade and Industry (DTI) it multi-agency price monitoring sa Western Visayas agud mapunggan ro hoarding, profiteering, ag bukon it makatarungang pagtaas it presyo it mga nagapangunang baeak-eon.
Suno sa DTI Region 6, tuyo it tikang nga pabaskugon ro pagbantay sa presyo ag protektahan ro mga bumaeakae sa tunga it pagtaas it presyo it langis ag pangkalibutanong presyur sa ekonomiya.
Ginpatigayon raya sa idaeom it Price Act of the Philippines ukon Republic Act No. 7581.
Sa nasambit nga programa, gintunga-tunga ro responsibilidad it nagkaeain-eain nga ahensiya sa pagmonitor it presyo it mga produkto.
Ro Department of Agriculture ro magabantay sa presyo it mga produktong agricultural kaparehas it bugas, isda, karne, tinuean-on ag asukar, samtang ro DTI mat-a ro magatutok sa mga processed goods kaparehas it de-lata, kape, sabong pang-eaba ag instant noodles.
Samtang, ro Department of Health ro magadumaea sa presyo it importanteng bueong, ro Department of Energy sa Liquified Petroleum Gas ag kerosene kamana man ro Department of Environment and Natural Resources sa uling ag panggatong.
Gin-engganyo it mga awtoridad ro publiko nga maging mapagmatyag ag ireport ro makadueodang pagtaas it presyo agud mapabilin nga patas ro kalakalan sa merkado.
