KALIBO, Aklan – Arestado ro sangka eaeaki matapos nga magprenda it mga pekeng alahas sa tatlo ka mga pawnshop sa Kalibo.
Ginasugid nga ro suspek hay naggamit it mga IDs nga may mga pangaeang Bong Alcantara, James Prado, Delfin Albao ag Allan Asera.
Suno sa sangka branch manager it sangka pawnshop nga nagpamalibad nga magpamitlang it pangaean nga nagprenda kanda ro suspek it singsing sa balor it P6,000.
Kasunod kara hay nakabaton imaw it mensahe halin sa anang mga kakilaea nga nagatrabaho man sa pawnshop nga may una nga naga eapta nga mga pekeng alahas.
Sa pagka-alarma, uman kara nga gintesting ro singsing nga ginprenda kana it eaeaki ag natukiban nga raya hay peke ag gintubog eamang.
Sa mayad nga swerte hay uman nga nagbalik ro suspek bangud sa nalipatan nga ID.
Insigidang nagpangayo it police assistance ro branch manager rason nga naaresto ro suspek.
Nagapadayun ro imbestigasyon it kapulisan agud nga masayuran ro matuod-tuod nga pangaean it suspek ag kun sin-o ro anang mga kaibahan.
