REGIONAL News — Nagapadayun ro search and rescue operation sa sangka eaeaki nga gina-alegar nga nag-eumpat sa Iloilo River, bandang ala-1:00 it aga-aga it Huwebes, Abril 3, 2025 sa City Proper bangud sa gina-alegar nga owa pagka-ilintindihan sa bayad sa naka-transaksyon nga mga commercial sex workers.
Ro eaeaki hay nakilaea sa pangaean nga alias Archie, 38, ag sangka manugbaligya it ice cream.
Sa interview it Bombo Radyo kay Darwin, igmanghud ni Archie, ginpahayag kara nga naga-inuman sanda sa Barangay Sinikway, Lapuz ag ko ulihi hay nagdesisyon sanda it anang manghud kaibahan ro daywang iba pa nga mag-transact sa mga commercial sex worker sa City Proper.
Sa alegasyon ni Darwin, kat makipag-istorya eon sanda sa commercial sex workers sa downtown area, gulpi eang nga may nagpaeapit nga mga eaeaki ag ginkabuligan sanda nga bugbugon.
Antes ro insidente, gina-alegar nga nakaangkon it owa pag-ilintindihan sa presyo matapos nga ginasugid nga nag-ayo ro mga ginbugbog.
“Nabun-an akon magulang bangud sa mga p*k-p*k… Hindi namin alam na ang mga p*k-p*k ay may mga asawa pala, edi pinagtulungan kami, edi nagka-engkwentro kami,” suno kay Darwin.
Owa sigon nakilaea ni Darwin kun sin-o ro mga eaeaki nga nagbugbog kanda apang nagapati imaw nga asawa ukon nobyo raya it mga commercial sex worker.
Ko ulihi, kat nabun-an si Archie sa ueo ag ginsakay raya sa tricycle, gina-alegar nga pag-abot maeapit sa tulay, gulpi raya nga nagdaeagan sa suba ag nag-eumpat sa tubi agud nga maghilam-os apang hasta sa makaron hay owa raya nakita.
